Ég skellti mér upp á land síðustu helgi með Féló (já, ég er byrjaður að vinna þar aftur =), nánar tiltekið á Selfoss þar sem okkar maður Sindri Freyr Guðjónsson tók þátt fyrir hönd Féló í Samstuð – söngvakeppni félagsmiðstöðva á Suðurlandi og er þetta svona eiginleg undankeppni fyrir söngkeppni Samfés sem haldin verður í lok febrúar á næsta ári. Fimm keppendur af 16 komust áfram í lokakeppnina og gerði Sindri sér lítið fyrir og nældi sér í miða á úrslitakvöldið, glæsilegt hjá honum.

Það var samt ekki það sem ég ætlaði að tala um hér heldur fyrirlestur sem ég, Sigþóra og að ég held allir krakkarnir frá Eyjum skelltu sér á. Þetta var fyrirlestur um tilvist geimvera og að sjálfsögðu var Magnús nokkur Skarphéðinsson (bróðir Össurar) fenginn til að kynna þetta efni fyrir áhugasömum unglingum, og okkur Sigþóru. Ég ætla að byrja á að segja að ég hef ávallt verið mjög skeptískur á tilvist geimvera, en jafnframt ekki gert mikið í því að fræðast um þetta ‘fyrirbæri’ af einhverri alvöru. Það er lítið fjallað um þessi mál og fólk sem segist hafa séð fljúgandi furðuhluti almennt talið geðbilað. Magnús kom nú samt með nokkur dæmi sem sönnun á tilvist geimvera og eiga Bandaríkjamenn víst að hafa í vörslu sinni einhverja 9 fljúgandi diska sem hafa brotlent þar, en neita því alfarið.

Hann sagði okkur einni frá einhverjum bónda í Sviss sem á fleiri tugi þúsunda ljósmynda af fljúgandi furðuhlutum sem reglulega komu í heimsókn til hans og tóku hann meðal annars með sér á sína plánetu, man ekki alveg hvað hann sagði að sú pláneta héti. Það sem mér fannst kannski undarlegast var að geimverurnar leyfðu honum að taka myndir af fljúgandi diskunum sínum en aldrei af sjálfum geimverunum og ekki heldur af plánetunni þeirra. Frekar gruggugt en þetta var nógu spennandi til að halda krökkunum við efnið, enda hef ég sjaldan séð unglinga hlusta á fyrirlestur með jafn miklum áhuga… meira að segja ég er farinn að lesa mig til um þetta á netinu…

En jæja, ætla að kalla þetta gott. Læt fylgja með myndir sem ég tók núna á sunnudaginn hérna í Eyjum annars vegar af sólarlagi vestur á hamri og hins vegar haustmynd dauðans. Njótið vel…

Já það er að koma sumar… reyndar komið samkvæmt dagatalinu en ég vil bíða aðeins lengur, allavega fram yfir próf. Það er nú þannig að ég klára próf 13. maí, nánar tiltekið á afmælisdaginn minn (tölum ekki meira um það). Svo tekur við sumarvinnan en það er nokkuð ljóst að mig mun ekki skorta atvinnu í sumar. Ég verð hjá Grími Kokk og með því mun ég svo vinna hjá Einari Birni um helgar í veislum og fleiru tilfallandi, en hann rekur núna veisluþjónustuna Einsa kalda. Þá kem ég einnig til með að vinna hjá þeim félögum á 24seven ehf, en þeir reka meðal annars frétta og umræðuvefinn eyjar.net. Þar mun ég sjá um að setja inn fréttir, taka ljósmyndir og vera með puttann á púlsinum í Eyjum í sumar. Svo er aldrei að vita nema Stefán á Café reyni að fá mann til sín svona inn á milli… þegar mest er, eins og var síðustu helgi! Það er ekki laust við að það sé komin svolítil tilhlökkun í mann, þar sem þetta er ekkert í líkingu við það sem maður hefur verið að gera síðastliðin sumur og á ég ekki von á öðru en að þetta verði skemmtileg tilbreyting.

Annars er sumarskapið að koma hægt og bítandi milli þess sem maður lærir undir lokaprófin. Við feðgarnir (ég, Ingólfur & pabbi) tókum okkur til og keyptum okkur glænýtt grill fyrir sumarið. Ég tók mér heila kvöldstund í að setja gripinn saman í gær þar sem ég var ekki að fara í próf í morgun. Þetta er ekkert smá grill, 4 undirbrennarar, einn yfirbrennari til að halda hitanum í grillinu og svo einn brennari á hliðinni. Svo er auðvitað kælibox á hinni hliðinni undir bjórinn… semsagt alvöru grill. Svo fylgir grillteinn með mótor svo hægt er að grilla læri og heila kjúklinga eins og ekkert sé. Læt hérna fylgja mynd af gripnum og ætla að kalla þetta gott… best að koma sér í lærdómsgírinn fyrir sálfræðipróf!

Ég held ég hafi aldrei talað um Bakkafjörumálið svokallaða hérna á blogginu, en eftir miklar umræður í fjölmiðlum (allavega hér í Eyjum) upp á síðkastið verð ég bara að fá að tjá mig um þetta stórmikilvæga mál sem snertir okkur öll sem hér á þessari eyju búum.

Nú er mikið rætt um undirskriftalista sem Magnús Kristinsson stendur fyrir á heimasíðunni ströndumekki.is þar sem um 2800 manns hafa skráð sig þegar þetta er skrifað. Ég renndi augunum í fljótu bragði yfir listann og gat ekki betur séð en að fólk sé að skrá börnin sín þarna (þá meina ég ungabörn) sem ég tel bara vera vitleysu. Í rauninni mun þessi undirskriftasöfnun gera lítið annað en að tefja framkvæmdir við Bakkafjöruhöfn þar sem ríkisstjórnin hefur þegar samþykkt þessar framkvæmdir. Af hverju kom þessi listi ekki löngu fyrr? Að setja þetta fram svona núna þegar allt hefur verið samþykkt minnir mann nú bara á mótmæli Ómars Ragnarssonar við Kárahnjúkum, og við vitum öll hvernig það endaði.

Ég get ekki annað en verið sammála bæjarstjóranum mínum í því sem fram kemur í svari hans þar sem hann er spurður út í undirskriftasöfnunina á mbl.is. Þar bendir hann á rangfærslur þeirra sem standa að þessari undirskriftasöfnun, þar sem þeir tala um að sjóferðin milli Eyja og Bakkafjöru verði 40 mínútur en réttur tími er 30 mínútur. Þeir tala um að ófært verði stóran part úr árinu en rannsóknir sýna að niðurfelldar ferðir verði ekki meiri en núverandi Herjólfur stendur fyrir.

Helsta vopn þeirra sem að undirskriftasöfnuninni standa er að mínu mati myndbandið sem þeir hafa til sýnis á heimasíðu sinni, á meðan helsta vopn þeirra sem styðja Bakkafjöru er yfir 100 blaðsíðna löng skýrsla frá Siglingastofnun með öllum þeim upplýsingum og svörum sem forvitnir og áhugasamir aðilar um þetta mál þurfa. Hana er hægt að nálgast hér. Ég byrjaði bara að lesa hana í dag og fann strax svör við mörgum spurningum sem ég hafði í sambandi við Bakkafjöruhöfn og hvort hún yrði áreiðanlegur kostur. Ég komst til dæmis að því að:

• Rannsóknarvinna hefur verið í gangi frá árinu 2003
• Bakkafjara er sá staður þar sem ölduhæð er hvað minnst við suðurströnd landsins, hún er í vari af Vestmannaeyjum
• Farþegafjöldi ferjunnar verður vel yfir 300 manns og mun hún geta tekið allt að 36 fólksbíla
• Siglingartími verður um 30 mínútur og gert er ráð fyrir 2 ferðum á dag, 4 yfir sumartímann en fleiri ef þörf krefur.
• Öldumælingar yfir 26 mánaða tímabil sýna að 39 ferðir hefðu fallið niður á þessu tímabili, 36 að vetrarlagi og 3 yfir sumartímann.
• Mörgum af þessum ferðum hefði verið hægt að hliðra um nokkrar klukkustundir og sigla þegar veðrnu slotaði.
• Hefði það verið gert kom í ljós að um 15 ferðir hefðu fallið niður, allar að vetrarlagi.
• Er sú tíðni frátafa sambærileg frátöfum Herjólfs sem að jafnaði verður að fella niður ferðir tvisvar til þrisvar á ári. (Þessi tala hefur nú reyndar verið að hækka, eða er það ekki?)

Mér finnst allt of mikið vera um að einlit umræða myndist um leið og eitthvað svona skýtur upp kollinum (sbr. ströndumekki.is) og mikilvægt að benda fólki á að skoða hlutina út frá báðum sjónarmiðum. Ég veit það að margir nenna að horfa á 5 mínútna langt myndband á YouTube, en ég veit það líka að margir nenna ekki að lesa yfir 100 blaðsíðna skýrslu… Þess má svo til gamans geta að skipstjórinn á Lóðsinum, Sveinn Rúnar Valgeirsson, sagði þetta eftir leiðangurinn sem þeir fóru upp í Bakkafjöru í fyrra, sem hefði kannski mátt fylgja vídjóinu:

“Í sjálfu sér er ég ekki hræddur um að væntanleg ferja gæti orðið í hættu en ég óttast að minni skip gætu orðið fyrir áföllum við þessar aðstæður.”

Kynnum okkur málin áður en við ákveðum að við séum strand.

Ég skellti mér á nokkrar vaktir í Vinnslustöðinni í síðustu viku, sem reyndar teygðu sig alveg fram á mánudagsmorgun núna í þessari viku. Allt í allt held ég að ég hafi nælt mér í um 10 vaktir og er ég bara nokkuð sáttur við það… allavega ef það gengur eftir sem sjávarútvegsráðherra hefur gefið út um loðnukvóta. Hefðbundnum veiðum var hætt á hádegi á föstudaginn síðasta en ég held reyndar að Kapin hafi fengið að fara út aftur á laugardagskvöld vegna þess að þeir ‘áttu inni’ óveiddan kvóta sem hafði verið gefinn út fyrir bannið. Svo nú eru nokkur skip að aðstoða hafrannsóknarskipin við loðnuleit á miðunum og heyrði ég í fréttunum í gær að þeir væru nú að finna ágætis magn af loðnu hérna aðeins austan við Eyjarnar.

Sjómenn hafa reyndar kvartað mikið undan seinagangi Hafró manna, um að þeir skili sér seint á miðin til mælinga eftir að skipstjórar hafa látið þá vita af torfum. Las reyndar helvíti góða grein frá áhöfninni á Faxa RE sem er að finna hér. Mjög fyndin og lýsir að ég held mjög vel skoðunum sjómanna á þessu loðnuveiðibanni og áliti þeirra á Hafró. Las nú samt frétt á mbl.is þar sem sagt er að loðnumælingar standi nú yfir á fullu og að ‘allt sé í sómanum’ – að sögn Sveins Sveinbjörnssonar leiðangursstjóra. Hvað maður á svo að lesa út úr þeim skilaboðum kemur vonandi í ljós fyrr en síðar, því ekki veitir manni nú af meiri pening, fátæki námsmaðurinn sjálfur. Svo er þetta líka bara svo gaman!

Jæja, ætla ekki að hafa þetta lengra. Kominn tími á svefn. Set hérna inn úrslit könnunarinnar sem ég lét fylgja með síðustu færslu… þar sem greinilega langflestir skoða mbl.is mest.

[poll=2]

Ég var ekki langt frá  því að hlaupa út á lóð með Liverpool treyjuna mína og bera að henni eld eftir leikinn í kvöld. West Ham 1 – 0 Liverpool. Ég píndi augun til að horfa á þessa skelfingu alveg til enda, eða þangað til West Ham fengu vítaspyrnuna og ég þoldi ekki meir. En svona fór nú það og spurning hvort við náum 4. sætinu í deildinni… Svo verður líka spennandi að sjá hvernig málin þróast í bækistöðvum Liverpool. Mun Benitez fjúka? Munu eigendurnir yfirgefa félagið? Eða kannski bara eitthvað allt annað… eitthvað þarf allavega að gerast, það er nokkuð ljóst.

En að öðru. Ég er tveimur áföngum í skólanum þessa önnina sem skera sig svolítið út úr þeirri flóru áfanga sem ég hef tekið í gegnum tíðina. Þetta eru áfangar sem heita Rekstrarhagfræði 103, sem kemur að almennum rekstri og umsjón fyrirtækja og stofnana,  og Viðskiptafræði 113, sem er markaðsfræðiáfangi og hefur komið mér mikið á óvart. Ég hef aldrei lært neitt þessu tengdu áður og verð ég að segja að þetta sýnist nokkuð spennandi, allavega svona í byrjun annarinnar. Í Viðskiptafræðinni erum við að byrja á verkefni þar sem okkur var skipt niður í hópa, 2 og 2 saman í hóp. Hver hópur finnur sér viðfangsefni til að markaðssetja, má vera hvað sem er… fyrirtæki, vara eða þjónusta en það er eitt skilyrði, þetta þarf að vera fyrirtæki, vara eða þjónusta í Vestmannaeyjum.

Ég og Randver skelltum okkur saman í hóp og byrjuðum að brainstorma um hvað við ættum hugsanlega að reyna að markaðssetja í Vestmannaeyjum. Upp úr því komu nokkrar hugmyndir sem við eigum svo eftir að fínpússa, eins og t.d. Saltverksmiðja, Rauða lónið, endurmarkaðssetja Höllina sálugu og fleira og fleira. En ég verð að segja alveg eins og er… þetta er örugglega einn skemmtilegasti áfangi sem ég hef farið í… gæti ég hugsanlega verið búinn að finna eitthvað sem ég væri til í að vinna við í framtíðinni? Eða er þetta bara það að ég er að prófa eitthvað nýtt…?

Jæja… það kemur bara í ljós.

Var rétt í þessu að lesa frásögn manns hér í bæ, þar sem hann lýsir því að hann hafi orðið vitni af því að unglingur í Grunnskólanum hér í Eyjum hafi verið að drekka áfengi fyrir utan húsið hans klukkan 9 um morguninn á skólatíma. Strákurinn var að gúffa í sig hálfum líter af bjór eldsnemma um morgun og það á skólatíma. Ég veit eiginlega ekki hvernig ég á að orða mín viðbrögð við þessu, ég er eiginlega bara orðlaus. Þetta eru að sjálfsögðu skelfilegar fréttir og ættu vonandi að vekja viðbrögð foreldra og kennara hér í bæ. Maður vissi svo sem að það eru alltaf einhverjir krakkar sem byrja að fikta við áfengi í efstu bekkjum grunnskóla, en að um sé að ræða neyslu áfengis í byrjun dags, á skólatíma hlýtur að gefa til kynna að ekki sé allt með felldu heima hjá viðkomandi. Ég hef í það minnsta ekki heyrt um svona lagað áður.

En þetta var nú samt ekki ástæða þess að ég gaf mér tíma til að henda inn nokkrum línum. Í þessari frétt (sem er reyndar blogg frá Þorkeli Sigurjónssyni) talar hann um eigin reynslu af áfengi þegar hann var á grunnskólaaldri, og að sú reynsla hafi verið kveikjan að yfir 40 ára baráttu hans við Bakkus. Ég þekki ekki hans sögu, en samgleðst honum að hafa náð að vinna úr sínum vandamálum að sjálfsögðu. Ég er bara ekki sammála honum þegar hann segir að með “meiru og betra aðgengi” að bjór og léttvíni, (þar sem hann er að tala um frumvarp sem var lagt fyrir á Alþingi og felur í sér að bjór og létt áfengi verði selt í verslunum) sé verið að stuðla að aukinni unglingadrykkju – eða bara aukinni drykkju yfir höfuð.

Ég tel rót áfengisvandans liggja dýpra en í hversu auðvelt (eða ekki) það sé að útvega sér áfengi. Það vita það allir að unglingur sem langar í áfengi, reddar sér áfengi á einn eða annan hátt. Ég held ég geti nú alveg fullyrt það að unglingadrykkja hér á Íslandi er ekkert minni en í nágrannalöndum okkar, þar sem áfengi er selt í verslunum. Þvert á móti hafa Íslendingar orð á sér sem djammkóngar og eru til dæmis auglýstar ferðir hingað til lands þar sem tekið er fram að djammið í Reykjavík sé engu líkt þar sem djammað er fram á morgun og jafnvel lengur, og held ég það séu orð með réttu. Ástandið í miðbæ Reykjavíkur hefur örugglega aldrei verið skuggalegra, fréttir af líkamsárásum, stungum og þess háttar hafa aldrei verið fleiri en nú.

Ég myndi halda að aðstæður heima hjá þessum unga manni, sem Þorkell sá sötra á bjór fyrir utan heima hjá sér klukkan 9 um morgun á skóladegi, sé ástæða þess að hann snýr sér að áfenginu til að “deyfa” tilveruna. Það hvort ákveðið verði að selja áfengi í verslunum eða ekki mun örugglega ekki hafa nein áhrif á það hvort hann eigi eftir að gera þetta aftur eða ekki. Þetta er einstakt dæmi, ég hef allavega aldrei heyrt um svona lagað áður og maður skyldi ætla að ekki sé allt í lagi heima fyrir hjá viðkomandi. Er þá ekki réttara að eiga við þann vanda áður en farið er í að “fyrirbyggja” annan hugsanlegan vanda?

Maður spyr sig…

Það hefur verið mjög sérstakt andrúmsloft á Brimhólabraut 1 þessa dagana, þar sem mamma er búin að vera á fullu í að sortera gamlar myndir sem hún var búin að ‘týna’ og koma þeim í albúm. Ég hef gefið mér smá tíma til að skoða eitthvað af þessu ógrynni sem hún móðir mín hefur tekið af myndum í gegnum tíðina, og þá aðallega frá því þegar við bjuggum á Búhamrinum góða. Ég verð nú bara að segja það að ef ríkidæmi væri metið í minningum á borð við ljósmyndir og alls kyns dót og drasl sem við krakkarnir höfum komið með heim úr skólanum og gefið okkar ástkæru foreldrum, þá bara Björgólfur hvað – Sigga Þórhalls væri nafnið sem væri á allra vörum í dag. Ég er ekkert viss um að Britney Spears sé mest ljósmyndaðasta manneskjan í heiminum… Þegar myndavélin var/er komin á loft hjá mömmu þá er ekki aftur snúið, það er enginn óhultur. Ég er alls ekki að segja að þetta sé slæmt, þvert á móti þegar maður gefur sér tíma til að setjast niður og skoða þetta allt saman. Ég man að ég var ekkert allt of spenntur fyrir myndatökurnar hjá mömmu, enda sést það mætavel á svona 2/3 af myndunum.

Það er einmitt á svona tímum sem maður sér hvað það er mikilvægt að eiga myndirnar sínar í albúmi, ekki bara á stafrænu formi í tölvunni. Ég veit ekki hvað ég á mikið af myndum í tölvunni sem ég bara hef ekki hugmynd um, þar sem ég nenni voðalega lítið að skoða allar þessar myndir á tölvuskjánum. Það er miklu meiri fílingur að fletta í gegnum albúmin.

Albúmin sem ég hef verið að skoða eru mestmegnis úr afmælum okkar bræðranna (míns, Sigga og Ingólfs) nú eða bara þegar mömmu hefur fundist ástæða til að smella af nokkrum myndum heima fyrir. Ég ákvað nú bara svona til að leyfa ykkur fá smjörþefinn af þessari skemmtun minni að skanna inn eins og 2 – 3 myndir, eina úr afmæli, eina úr tindátaleik úti í garði og svo eina sem ég sá á fermingarskeyti hjá Elenu systur, en það er greinilega mjög gömul mynd af Landakirkju með rautt þak, menntavegurinn góði áður en hann varð bara fyrir gangandi vegfarendur (hmmmm) og svo verið að byggja við Barnaskólann. Helvíti skemmtilegar myndir allt saman.

Þekkir fólk krakkana á þessum myndum?

Maður getur víst ekki annað en látið undan þegar Ólöf Ragnarsdóttir biður um blogg frá manni. Vá hvað ég hlýt að vera ómissandi partur í lífi hennar En ég ætla að sjálfsögðu að eyða nokkrum línum hér í að hrauna yfir okkur blessaða landslið í fótbolta. Ég get bara ekki með nokkru móti skilið hvað í !”#$#”/& er í gangi þar á bæ!?! Við ‘vinnum’ Spánverja 1 – 1 hérna á heimavelli (vinnum að sjálfsögðu miðað við höfðatölu) og vinnum svo Norður-Íra 2 – 1 einnig á heimavelli. Eftir þessi snilldar úrslit þýtur liðið upp um heil 37 sæti á FIFA listanum, úr 117 í 80.

Það þarf svo ekki að spurja með framhaldið, tap 2 – 4 fyrir Lettum á heimavelli og skíta svo upp á herðablöð í Lichtenstein 3 – 0. Hvað er málið!?! Af hverju getur þetta lið ekki haldið haus eftir ein eða tvenn góð úrslit? Ég verð að viðurkenna að allavega í leiknum við Lettana (horfði ekki á leikinn á móti Lichtenstein) vantaði klettinn í vörnina, Hermann nokkurn Hreiðarsson. Þeir voru gjörsamlega úti að aka og allir menn Letta fríir í hornspyrnum og aukaspyrnum (já, ég er Vestmannaeyingur

Nú er bara einn leikur eftir í riðlinum og er það leikur gegn Dönum á útivelli… ég vona bara að við töpum ekki meira en 14 – 2.

En að öðru, sá í Fréttum í síðustu viku svar sýslumannsins í Eyjum við viðtali sem tekið var við Andra, sem lenti í mótorhjólaslysi hérna í Eyjum í sumar. Þar fer Karl Gauti hamförum um að hann líði það ekki að logið sé upp á lögregluna í Vestmannaeyjum og talar nánast eins og Andri sé að kenna löggunni um það hvernig fór fyrir honum. Bíddu, má allt í einu ekki gagnrýna störf lögreglunnar? Má ekki sá sem hefur lent í slysi eða átt önnur samskipti við lögregluna tala um sína reynslu sama hvort hún sé góð eða slæm? Það sem hann hefur í höndunum eru vinnuskýrslur frá þeim sem þarna voru á staðnum, ég ætla að leyfa mér að efa að hann hafi verið á staðnum sjálfur. Ég vil benda á að ég er alls ekki að taka afstöðu í þessu máli, heldur að benda á það að gagnrýni Andra á störf lögreglu og lækna á slysstað er ekkert alvarlegri en ásökun sýslumanns um að Andri sé að ljúga.

Það hefur mikið verið rætt í blöðunum að það vanti menn í lögregluna hér í Vestmannaeyjum og ég gat ekki betur séð í sumar að flestir voru þetta afleysingamenn sem hér voru, einhverjir héðan úr Eyjum en einnig einhverjir ofan af landi. Mér finnst ekki skrýtið að Andri setji spurningamerki við störf á slysstað ef læknar í Reykjavík hafi sagt að þeir hafi ekki búist við honum svona ‘illa förnum’, sama hvort þar var um að kenna störfum læknis eða sjúkraflutningamanna (lögreglu). Af hverju ekki að taka gagnrýninni og ýja því frekar að, að það vanti mannskap í þessi störf svo að það komi nú líka fram. Þess í stað kemur höstug grein frá Sýslumanni þar sem hann fullyrðir að ekkert hafi verið gert vitlaust, Andri sé fúll út í afleyðingar slyssins en geti bara sjálfum sér um kennt. Svo kemur í lokin ‘dulin’ batakveðja til Andra.

Það er auðvelt að vera stórt nafn í litlu bæjarfélagi og kaffæra gagnrýnisraddir í bæjarblöðunum, en hvernig væri nú að horfast í augu við raunveruleikann og viðurkenna að hingað vantar lærða lögreglumenn/sjúkraflutningamenn, og þá sérstaklega yfir sumartímann.

Nú tók í gildi í sumar, nánar tiltekið 1. júní, reykingabann hér á landi sem kveður á um að reykingar séu með öllu óheimilar á veitingahúsum og skemmtistöðum. Til að hafa þetta svolítið háfleygt og flott ætla ég að vitna í fyrstu málsgrein “reykingalaganna” svokölluðu

Tóbaksreykingar eru óheimilar í þjónusturými stofnana, fyrirtækja og félagasamtaka, svo sem á veitinga- og skemmtistöðum og þar sem menningar- og félagsstarfsemi fer fram, þ.m.t. íþrótta- og tómstundastarf. Sama er um þjónustusvæði utan húss séu þau undir föstu eða færanlegu þaki og meira en að hálfu leyti umlukin veggjum eða sambærilegum mannvirkjum.

Nú hefur maður kíkt einu sinni og kannski tvisvar á pöbbann hérna í Eyjum og ekki get ég sagt að þessu reykingabanni sé mikið fylgt eftir þar á bæ (að undanskildum Drífanda). Þá vaknar sú spurning í valdi hvers það er að framfylgja þessum lögum. Ég hefði haldið að það væri lögreglan, en lenti svo á spjalli við einstakling sem vinnur á skemmtistað og sagði hann að það væri ekki lögreglunnar að framfylgja þessum lögum, heldur væri það í höndum heilbrigðisyfirvalda.

Ég hélt einmitt að allt sem væri sett í lög á Alþingi væri lögreglunnar að framfylgja. Ég hef ekki mikið séð starfsmann frá heilbrigðisyfirvöldum taka pöbbaröltið hér í Eyjum til að skoða ástandið. Það er tvennt ólíkt að labba inn á stað þar sem reykingabannið er virt en stað sem það er ekki virt. Mér persónulega finnst að það eigi að vera í höndum lögreglu að gera eitthvað í þessu því annars mun þetta detta upp fyrir sig og reykingar leyfðar á öllum þessum stöðum, því auðvitað tapar þessi eini staður sem er virkilega að framfylgja reykingabanninu á því að hinir staðirnir skuli leyfa reykingar.

En í framhaldi af þessu langar mig til að spyrja hvort einhver viti hvort það sé lögreglunnar að framfylgja þessu eða ekki? Ég hélt það væru einhverjar himinháar sektir ef einhver yrði gripinn við reykingar inná staðnum… varla fer heilbrigðiseftirlitið að sekta? Og kannski eitt enn, hvað finnst fólki um þetta reykingabann?

Góða kvöldið, hvað segir mannskapurinn? Langt síðan síðast… allavega hérna í bloggheimum, enda hefur maður gefið sér lítinn tíma til að vera í tölvunni í sumar. Sumarið er búið að vera með eindæmum gott hérna í Eyjum og veðrið gjörsamlega verið óaðfinnanlegt. Ég vann sem flokkstjóri í vinnuskólanum í sumar og leit við og við í eldhúsið til hans Stebba á Café þegar þess þurfti. Þjóðhátíðin var snilld eins og búast mátti við, rættist heldur betur úr veðrinu þannig að ekkert hægt að kvarta undan henni.

Strax eftir Þjóðhátíð var svo gifting þar semThelma Rós stóra litla frænka játaðist honum Stymma (og auðvitað öfugt ) og fékk ég þann heiður að vera ljósmyndari í brúðkaupinu, sem heppnaðist svona líka bara ljómandi vel í alla staði. Enn og aftur til hamingju með þetta krakkar mínir

Nú er skólinn kominn á fullt skrið og bara gaman að því. Ég verð í 16 einingum og svo vonandi að vinna eitthvað með, hvort sem það verður Féló eða eitthvað annað (vonandi samt Féló) en ætti nú að geta haldið þessari síðu gangandi þrátt fyrir að það verði mikið að gera þar sem stundataflan er eins og svissneskur gæðaostur, með tilheyrandi götum… en laus við lyktina…

Jæja, ætla ekki að hafa þetta lengra. Langaði bara að láta vita af mér, ég er kominn á ról í tölvuheimum aftur og því skuluð þið búast við því að þurfa að detta hérna inn allavega þriðju hverju viku… eða dag