Haldiði að maður hafi ekki bara tekið sig til og farið í göngu í Elliðaárdalnum í vikunni, en tilefnið var auðvitað að Þórhallur bróðir kom með nýju Canon EOS 50D myndavélina mína til landsins um síðustu helgi. Auðvitað varð ég að prufukeyra gripinn og varð Elliðaárdalurinn fyrir valinu, þar sem hann er svona stysta leið í náttúru hér á höfuðborgarsvæðinu að ég held. Fór út á mánudagseftirmiðdegi og náði nokkrum góðum skotum, aðallega af fuglum. Mikið rosalega er hressandi að skella sér í svona smá göngu og ekki skemmdi veðrið fyrir, enda var fullt af fólki að hreyfa sig þarna. Ætla að láta fylgja með eina mynd, en restin af myndunum er inná flickR-inu mínu.

Annars er bara gott að frétta af mér héðan úr Reykjavíkinni. Námskeiðið er rúmlega hálfnað og gengur bara vel, hefði verið betra fyrir Vestmannaeyinginn mig að hafa skólann allan daginn í 2 vikur í staðinn fyrir hálfan daginn í 4 vikur en þeir eru væntanlega að hugsa um hinn vinnandi mann hér í Reykjavíkinni, þótt helmingurinn sem er með mér hérna á námskeiðinu séu atvinnulausir… Svona er bara staðan í dag, nú reyna menn að ná sér í menntun til að eiga meiri möguleika á vinnu og þá kannski betri vinnu seinna meir. Maður má eiginlega bara þakka fyrir að hafa vinnu…

Annars er ég á leiðinni heim til Eyja á morgun og get ekki beðið! Er búinn að vera í bænum í tæpar 3 vikur og það kalla ég bara nokkuð gott fyrir mig að höndla Það er víst nóg að gera en það er bæði ball í Höllinni og eitthvað DJ kvöld á Prófastinum á laugardaginn svo það er spurning hvað maður gerir… Jæja, pásan búin – læra meira!

Jæja þá er maður búinn að koma sér fyrir í höfuðborg eymdar og volæðis, nánar tiltekið á Langholtsveginum hjá Sigga bró. Hingað er ég kominn í leit að menntun, en ég hef skráð mig á tæplega fjögurra vikna námskeið í kerfisstjórnun hjá Tölvuskólanum iSoft – Þekking, svokallað grunnnám.

Fyrsti ’skóladagurinn’ er í fyrramálið klukkan 8:30 og verður skóli alla virka daga til og með 20. mars næstkomandi og þarf ég því að dúsa í Reykjavíkinni í tæpan mánuð (að einni helgi undanskilinni sem Thelma hefur heimtað að fá mig til Eyja =) Ég hef barasta góða tilfinningu fyrir þessu námskeiði og vonast til að læra alveg hreint heilan helling sem mun koma til með að nýtast mér vel hjá Samma…

Námskeiðið er þó því miður bara fyrir hádegi svo ég mun þurfa að finna mér eitthvað að gera hér eftir klukkan 12… en auðvitað tók ég með mér myndavélina svo það verður kannski ekki svo erfitt, svo var Sammi svo góður að lána mér eitt stykki ferðavél til að hafa í náminu… þar sem mín er auðvitað steindauð, og það fyrir löngu.

Jæja, best að henda sér í bólið til að vera hress fyrsta skóladaginn!

Já það er að koma sumar… reyndar komið samkvæmt dagatalinu en ég vil bíða aðeins lengur, allavega fram yfir próf. Það er nú þannig að ég klára próf 13. maí, nánar tiltekið á afmælisdaginn minn (tölum ekki meira um það). Svo tekur við sumarvinnan en það er nokkuð ljóst að mig mun ekki skorta atvinnu í sumar. Ég verð hjá Grími Kokk og með því mun ég svo vinna hjá Einari Birni um helgar í veislum og fleiru tilfallandi, en hann rekur núna veisluþjónustuna Einsa kalda. Þá kem ég einnig til með að vinna hjá þeim félögum á 24seven ehf, en þeir reka meðal annars frétta og umræðuvefinn eyjar.net. Þar mun ég sjá um að setja inn fréttir, taka ljósmyndir og vera með puttann á púlsinum í Eyjum í sumar. Svo er aldrei að vita nema Stefán á Café reyni að fá mann til sín svona inn á milli… þegar mest er, eins og var síðustu helgi! Það er ekki laust við að það sé komin svolítil tilhlökkun í mann, þar sem þetta er ekkert í líkingu við það sem maður hefur verið að gera síðastliðin sumur og á ég ekki von á öðru en að þetta verði skemmtileg tilbreyting.

Annars er sumarskapið að koma hægt og bítandi milli þess sem maður lærir undir lokaprófin. Við feðgarnir (ég, Ingólfur & pabbi) tókum okkur til og keyptum okkur glænýtt grill fyrir sumarið. Ég tók mér heila kvöldstund í að setja gripinn saman í gær þar sem ég var ekki að fara í próf í morgun. Þetta er ekkert smá grill, 4 undirbrennarar, einn yfirbrennari til að halda hitanum í grillinu og svo einn brennari á hliðinni. Svo er auðvitað kælibox á hinni hliðinni undir bjórinn… semsagt alvöru grill. Svo fylgir grillteinn með mótor svo hægt er að grilla læri og heila kjúklinga eins og ekkert sé. Læt hérna fylgja mynd af gripnum og ætla að kalla þetta gott… best að koma sér í lærdómsgírinn fyrir sálfræðipróf!

…að læra undir sálfræðipróf núna en eins og svo oft áður leitar hugurinn eitthvað allt annað. Ég er náttúrulega evrópumeistari í að finna mér eitthvað annað, mjög svo tilgangslaust að gera í staðinn fyrir jafn yndislegan hlut og að læra undir próf! Í þessu tilfelli er það MSN og að slæpast á veraldarvefnum…

En í dag er bolludagur og ég var að fatta það að ég hef ekki innbyrt eina einustu bollu… og mér er eiginlega bara alveg sama. Hef yfirleitt skellt einu stykki framan í mig eða svo bara svona til að vera með, en ekki í dag. Það er kannski bara fínt, allavega miðað við ‘næringargildið’ í þessum kvikindum…

Svo var Slingerinn að tilkynna mér það að ég hafi verið tilnefndur í könnun á síðunni hans. Kíkti þangað og kom í ljós að ég hef verið tilnefndur í tveimur mjög svo mismunandi flokkum, annars vegar sem bloggari ársins 2007 – og hins vegar sem versta bloggsíðan árið 2007. Ég veit ekki hvora tilnefninguna ég er ánægðari með… ef ég myndi vinna bloggara ársins yrði sett pressa á mig sem ég yrði að standa undir um að blogga reglulega og þá um eitthvað af viti. Það vita það allir sem mig þekkja að ég er bara ekki þannig. Hins vegar ef ég myndi vinna verstu bloggsíðuna væri engin pressa, “já þetta var kosin versta bloggsíðan 2007… hann má þetta alveg”. Það væri kannski meira minn kaffibolli… en allavega, skellið ykkur endilega yfir til Slingersins og kjósið í þessum mjög svo skemmtilegu könnunum…

Ég ætla að fara að koma mér í lærdómsstuð… ekki veitir af

Ég var ekki langt frá  því að hlaupa út á lóð með Liverpool treyjuna mína og bera að henni eld eftir leikinn í kvöld. West Ham 1 – 0 Liverpool. Ég píndi augun til að horfa á þessa skelfingu alveg til enda, eða þangað til West Ham fengu vítaspyrnuna og ég þoldi ekki meir. En svona fór nú það og spurning hvort við náum 4. sætinu í deildinni… Svo verður líka spennandi að sjá hvernig málin þróast í bækistöðvum Liverpool. Mun Benitez fjúka? Munu eigendurnir yfirgefa félagið? Eða kannski bara eitthvað allt annað… eitthvað þarf allavega að gerast, það er nokkuð ljóst.

En að öðru. Ég er tveimur áföngum í skólanum þessa önnina sem skera sig svolítið út úr þeirri flóru áfanga sem ég hef tekið í gegnum tíðina. Þetta eru áfangar sem heita Rekstrarhagfræði 103, sem kemur að almennum rekstri og umsjón fyrirtækja og stofnana,  og Viðskiptafræði 113, sem er markaðsfræðiáfangi og hefur komið mér mikið á óvart. Ég hef aldrei lært neitt þessu tengdu áður og verð ég að segja að þetta sýnist nokkuð spennandi, allavega svona í byrjun annarinnar. Í Viðskiptafræðinni erum við að byrja á verkefni þar sem okkur var skipt niður í hópa, 2 og 2 saman í hóp. Hver hópur finnur sér viðfangsefni til að markaðssetja, má vera hvað sem er… fyrirtæki, vara eða þjónusta en það er eitt skilyrði, þetta þarf að vera fyrirtæki, vara eða þjónusta í Vestmannaeyjum.

Ég og Randver skelltum okkur saman í hóp og byrjuðum að brainstorma um hvað við ættum hugsanlega að reyna að markaðssetja í Vestmannaeyjum. Upp úr því komu nokkrar hugmyndir sem við eigum svo eftir að fínpússa, eins og t.d. Saltverksmiðja, Rauða lónið, endurmarkaðssetja Höllina sálugu og fleira og fleira. En ég verð að segja alveg eins og er… þetta er örugglega einn skemmtilegasti áfangi sem ég hef farið í… gæti ég hugsanlega verið búinn að finna eitthvað sem ég væri til í að vinna við í framtíðinni? Eða er þetta bara það að ég er að prófa eitthvað nýtt…?

Jæja… það kemur bara í ljós.

Jæja góðan daginn, hvað segir fólkið? Langt síðan síðast eins og svo oft áður… Jólin eru búin og mikið hafði maður það nú gott. En nú er komið nýtt ár og skólinn byrjaður á ný. Ég er í 19 einingum og stefni á útskrift næstu jól, en segi það nú samt með fyrirvara um breytingar…  

Ég ákvað að bregða út af vananum þennan þrettándann og skella mér til Reykjavíkur þar sem Þórir, kærastinn hennar Elenu var að halda upp á 30 ára afmælið sitt. Fínt að breyta aðeins til og var mjög gaman í þessari afmælisveislu, sem var vægast sagt vel sótt… gjörsamlega troðið heima hjá þeim. Það er naumast að maðurinn er búinn að sanka að sér mörgum vinum þessi 30 ár…

Svo er bara komið að grámygluðum hversdagsleikanum aftur, veðrið hérna í Eyjum er alveg út úr kú eins og er og það bregst ekki að alltaf á þessum tíma fer hugur manns að leita út fyrir landsteinana, í sól og sumaryl. Ég og Thelma vorum að skoða heimasíður ferðaskrifstofa í gær og var mest skoðað Tyrkland og Krít… nú er bara að sjá til hvort maður sjái fram á að geta skellt sér út næsta sumar, en til þess þarf maður að endurskipuleggja fjárhaginn… selja bílinn og síðast en ekki síst fara að hugsa út í sumarvinnu.

Og þá að aðalmálinu… haldiði að maður hafi ekki verið að eignast annan frænda í byrjun þessa mánaðar. Þau Þórhallur og Hrund eignuðust gullfallegan dreng sem átti nú reyndar ekki að líta dagsins ljós fyrr en í febrúar, en allt gekk þetta þó upp og er hann sprækur sem lækur í dag. Ég vil bara óska þeim enn og aftur til hamingju með litla kút og jafnframt láta ykkur fáu lesendur mína vita af þessu, ef þið vissuð þetta ekki nú þegar

En jæja, tíminn er búinn. Bið að heilsa ykkur…

Það er aldeilis sem þessi blessaði tími líður. Nóvember er um það bil hálfnaður og það þýðir bara eitt, jólin eru á næsta leiti. Það er nú reyndar alveg einn og hálfur mánuður síðan maður sá fyrstu jóla auglýsinguna, þar sem Garðlist eða hvaða fyrirtæki það var auglýsti í gríð og erg jólaskreytingaþjónustu og að fólk ætti að panta tímanlega fyrir jólin. Mér hefur reyndar alltaf þótt hund leiðinlegt að jólaskreyta en kommon… ráða menn í vinnu við að skreyta húsið sitt? Ég hugsa allavega að það væri eitt af því síðasta sem mér dytti í hug… alveg sama hversu stressaður og í mikilli tímaþröng maður væri.

Nú eru hins vegar allflest fyrirtækin sem auglýsa af einhverju viti í sjónvarpi komnar með jóla-auglýsingarnar í gang. Margir tala um að verið sé að fyrirtæki séu að reyna að teygja ‘jóla törnina’ til þess að græða sem mest. Ég veit ekki með ykkur en þótt ég sjái jólaauglýsingu eða skraut í október kemst ég ekkert fyrr í jólaskapið góða. Jólin eru hátíð fjölskyldunnar og er það algjörlega undir minni fjölskyldu komið hvenær ég kemst í jólaskap. Þegar mamma setur jóladisk í spilarann og byrjar að skreyta heima fyrir og þegar fólkið byrjar að tala um hvað það eigi eiginlega að gefa hinum og þessum í jólagjöf.

Það er að skapast nokkur hefð fyrir því hjá mér að skreppa til Þórhalls bró og Hrundar í London fyrir jólin og ætla ég að sjálfsögðu ekki að bregða út af vananum þessi jólin. Ég, Thelma, Ingólfur bró og Kristrún ætlum að skella okkur til þeirra strax eftir próf, eða 13. des og verðum við í jólagjafainnkaupum og fleiru til 17. des. Algjör snilld að klára jólagjafakaupin í London… ódýrara & aaaaaðeins fjölbreyttara úrval. Mæli með þessu!

Góða kvöldið, hvað segir mannskapurinn? Langt síðan síðast… allavega hérna í bloggheimum, enda hefur maður gefið sér lítinn tíma til að vera í tölvunni í sumar. Sumarið er búið að vera með eindæmum gott hérna í Eyjum og veðrið gjörsamlega verið óaðfinnanlegt. Ég vann sem flokkstjóri í vinnuskólanum í sumar og leit við og við í eldhúsið til hans Stebba á Café þegar þess þurfti. Þjóðhátíðin var snilld eins og búast mátti við, rættist heldur betur úr veðrinu þannig að ekkert hægt að kvarta undan henni.

Strax eftir Þjóðhátíð var svo gifting þar semThelma Rós stóra litla frænka játaðist honum Stymma (og auðvitað öfugt ) og fékk ég þann heiður að vera ljósmyndari í brúðkaupinu, sem heppnaðist svona líka bara ljómandi vel í alla staði. Enn og aftur til hamingju með þetta krakkar mínir

Nú er skólinn kominn á fullt skrið og bara gaman að því. Ég verð í 16 einingum og svo vonandi að vinna eitthvað með, hvort sem það verður Féló eða eitthvað annað (vonandi samt Féló) en ætti nú að geta haldið þessari síðu gangandi þrátt fyrir að það verði mikið að gera þar sem stundataflan er eins og svissneskur gæðaostur, með tilheyrandi götum… en laus við lyktina…

Jæja, ætla ekki að hafa þetta lengra. Langaði bara að láta vita af mér, ég er kominn á ról í tölvuheimum aftur og því skuluð þið búast við því að þurfa að detta hérna inn allavega þriðju hverju viku… eða dag

Jújú, það er barasta komið 2007. Eigum við að ræða það hvað þessi tími er farinn að líða hratt? 24. aldursárið farið að hellast allsvakalega yfir mann og árgangsmót á leiðinni næsta sumar! Var einmitt hittingur hjá árgangnum milli jóla og nýárs og mættu um 30 manns á Conero til að spjalla um ákvarðanir og skipa í nefndir. Niðurstöður þessa fundar má sjá á heimasíðu árgangsins http://83.einir.com.

Annars er voðalega lítið að frétta. Nóg búið að vera um að vera í djamminu þessi jólin eins og vanalega. Auðvitað hefur maður líka spilað svolítið með familíunni og spilin sem staðið hafa uppúr þessi jólin eru nýja trivial (sem er bara ekkert sérstakt..), sequence & auðvitað catan

Tók svo þessi líka snilldar áramót með Sigga Ara, Theo, Bixie og fleirum þar sem mér var gjörsamlega rústað í Buzz og ég sleppti við að borga fokking 2500 kall inn á áramótaball í Höllinni og láta svo okra á mér á ógeðisbarnum þar… WÚHÚ! Fólk var eldhresst á Drífanda og auðvitað fór maður þaðan út með öskubökkunum eins og vanalega… þaðan var haldið heim til Árna Óla þar sem var bókstaflega ENGINN. Gerðum okkur heimakomin í stofunni hjá honum til svona 9-10 þegar maður ákvað að koma sér heiiiim. Skál allir og takk fyrir frábær áramót!

GLEÐILEGT NÝTT ÁR !

Annars er bara skólasetning með öllu tilheyrandi á morgun og skólinn byrjar bara á föstudaginn… sjitturinn titturinn. Ætla að taka 2 fög í fjarnámi í FG nema að FÍV bjóði mér betur

Jæja… þangað til næst…

Jæja, kominn tími á færslu segiði? Já, kannski… Það hefur nú nokkuð drifið á daga mína síðan síðast. Ég eignaðist lítinn sætan frænda, en það var Elena systir sem varð fyrst af systkinunum að færa mömmu og pabba sitt langþráða barnabarn. Hann kom í heiminn 21. nóvember og allt gekk eins og í sögu. Vil ég bara enn og aftur óska Elenu og Þóri til hamingju með litla gullið og get ég ekki beðið eftir að kíkja á þau og knúsa litla guttann

Svo er maður nú í miðju prófafjöri. Búinn að fara 2 próf, Íslensku 403 og Sálfræði 103… Gekk bara svona ágætlega í báðum prófum, en svo á ég 4 kvikindi eftir. Fer i Ensku 503 á morgun, Sögu 203 á laugardaginn, Landafræði 103 á mánudaginn og svo loksins Félagsfræði 203 á miðvikudaginn. Próflokum verður svo fagnað með ferð til London þann 14. des ásamt Arndísi skvísu, en við munum gista hjá Þórhalli bró & Hrund í miklu yfirlæti eins og vaninn er á þeim bænum. Þar hef ég ákveðið að kaupa mér loksins iPod, og held ég að blár 4gb iPod Nano verði fyrir valinu… jafnvel grænn, en það kemur allt í ljós.

Svo er það planið eftir áramót, ég ætla að halda áfram í FÍV en minnka aðeins við mig og vera bara fyrir hádegi þar. Ég hef verið að skoða fjarnámið hjá hinum ýmsu skólum og hér um bil búinn að ákveða að taka 2 áfanga í fjarnámi í Fjölbrautaskólanum í Garðabæ. Þannig að þetta verður svona smá blanda hjá manni. Ég vonast líka eftir því að geta með því skellt mér á eitt stykki loðnuvertíð svona aðeins til að fríska upp á “sérhæfða fiskvinnslumanninn” og auðvitað bankabókina líka

Annað sem hefur óneitanlega vakið athygli mína, (og greinilega annarra sem þekkja mig) er að nú hafa matvöruverslanir tekið sig til og skellt okkur “Einirunum” á sölu hér og þar við litla hrifningu okkar þar sem við erum klárlega í útrýmingarhættu, teljum ekki nema tæplega 40 manns hér á landi sé millinafnið tekið með. Að þessu tilefni höfum við sem ekki þegar höfum verið seldir ákveðið að efna til háværra mótmæla fyrir utan Krónuna í Vestmannaeyjum á föstudaginn klukkan 15 og er búist við metmætingu! Styðjið okkur í GUÐANNA BÆNUM