Var búinn að lofa mér því að blogga ekki um þetta einstaklega óheillandi og já, bara leiðinlega mál, Icesave. Hef verið á báðum áttum með þetta án þess þó að vera að gaspra því út um allt eins og svo margir (á facebook) en hef komist að endanlegri niðurstöðu loksins og ætla hér að láta fljóta með einn fyrirlestur og einn pistil sem hjálpaði mér við þessa annars stóru ákvörðun:

Reimar Pétursson hæstaréttarlögmaður útskýrir dómstólaleiðina á mannamáli:

Og svo pistill eftir Hjört Smárason markaðsfræðing:

Þetta snýst ekki um reiði eða hefnd
By Hjörtur Smárason

Þeim mun meira sem ég les, hvort sem er frá já eða nei mönnum, þeim mun sannfærðari verð ég um að Nei sé eina rétta svarið á laugardaginn. Og það er ekki af því að ég sé svo reiður eða vilji hefna mín (á hverjum?).

Eins og málið horfir við mér, þá er þetta tiltölulega einfalt.

1. Einkabanki féll.

2. Innistæður voru tryggðar upp að vissri upphæð.

3. Bresk og hollensk stjórnvöld ákváðu að bæta innistæðueigendum tjónið að fullu. Ekkert samráð var við íslensk stjórnvöld um þessa ákvörðun.

4. Bresk og hollensk stjórnvöld vilja fá þessa upphæð bætta að fullu auk vaxta frá íslenskum stjórnvöldum.

Þeir munu fá bætur sem nema upphæð talsvert yfir þeirri upphæð sem tryggð var samkvæmt lögum (1175 milljarðar í stað 675) þó að sagt sé nei á laugardaginn. Það sem þeir eru að fara fram á er umtalsvert meira auk vaxta. Sú viðbót á sér enga lagalega eða siðferðislega stoð. Þetta var einkafyrirtæki sem fór á hausinn, innistæðueigendur eru búnir að fá sínar bætur þökk sé breskum og hollenskum yfirvöldum. Bresk og hollensk yfirvöld eru örugg um bætur úr þrotabúinu sem fara langt framúr því sem okkur ber skylda til.

Ef við skoðum málflutning nei og já manna eins og hann var settur fram í auglýsingum í dag þá var hann svona:

Nei auglýsingin telur fram 10 rök:

1. Engin lagaskylda að verða við kröfum Breta og Hollendinga

2. Það er ólíðandi að skuldum einkabanka sé velt á almenning

3. Þeir fengu ekki leyfi okkar

4. Þeir vilja frekar beita hótunum en að fara dómstólaleiðina

5. Bretar og Hollendingar fá 1175 milljarða þótt við segjum Nei

6. Samningurinn felur í sér of mikla áhættu fyrir þjóðina

7. Samningurinn breytir krónuáhættu í gjaldeyrisáhættu

8. Málstaður Íslands nýtur stuðnings erlendis

9. Já – leysir ekki vanda atvinnulífsins

10. Það er ekkert að óttast

Já auglýsingin telur fram eftirfarandi rök:

- fljótvirkara

- auðveldara

- skemmtilegra

- ódýrara

á meðan nei sé

- langdregið

- erfitt

- leiðinlegt

- og dýrt.

Ég veit ekki með ykkur, en ég ætla ekki að segja já og samþykkja vafasaman samning vegna þess að ég sé orðinn leiður á umræðunni. Ég á 5 börn og ég ætla ekki að horfa framan í þau og segja að ég hafi bara verið orðinn leiður á þessu. Það var svar formanns fyrsta samninganefndarinnar sem gerði einn versta samning sem gerður hefur verið frá Gamla sáttmála. Og vér mótmæltum öll!

Nú er kominn nýr samningur sem er vissulega mun betri en sá gamli. En það breytir því ekki að hann er ekki byggður á lagalegum forsendum heldur er hann skásta friðþægingin til þess að bresk og hollensk stjórnvöld láti ekki verða af hótunum sínum um að tefja ESB viðræður, IMF samninga eða annað sem þeir hafa hótað.

Sömu rökum er beitt nú og seinast um áhrif þess að segja nei – og ekkert af því rættist siðast og ég sé ekki af hverju það ætti að gera það núna. Þvert á móti, þá er Nei skýr skilaboð um að við látum ekki þvinga okkur í eitt eða neitt. Við ætlum ekki að láta velta ábyrgð einkabanka yfir á skattgreiðendur. Það að bresk og hollensk stjórnvöld hafi valið að gera það verða þeir að eiga við sína skattgreiðendur, ekki okkar. Við höfum tækifæri til að láta reyna á þetta mál fyrir dómsstólum, eitthvað sem almenningur í Bretlandi, Írlandi, Grikklandi og annars staðar í Evrópu vill mjög gjarnan til þess að þau sem skattgreiðendur þurfi ekki að taka á sig skuldir einkabanka þar.

Með því að segja Nei tryggjum við betur samningsstöðu Íslands í framtíðinni í öðrum málum því það sýnir að við erum þjóð sem lætur ekki þvinga sig með hótunum. Við höfum bein í nefinu til þess að segja Nei þegar okkur misbýður.

Ritstjórar virtra dagblaða eins og Financial Times, The Guardian og Wall Street Journal hvetja Íslendinga til þess að segja Nei. Lesendur sem hafa kommenterað á fréttir á þessum miðlum hvetja Íslendinga til þess að segja Nei. Fjöldi íslenskra og erlendra lagaprófessora og dómara hvetja Íslendinga til þess að segja Nei. Þeir sérfræðingar sem Já hliðin bendir á – eru fólkið í samninganefndinni! Og íslenskir Evrópusinnar hvetja okkur til þess að segja Já. En fjöldi embættismanna hjá ESB hefur lýst því yfir að Icesave hafi engin áhrif á umsóknarferlið eða samningaviðræðurnar þar þannig að aftur er það hæpinn hræðsluáróður. Matsfyrirtækið Moody’s hótar að setja Ísland í ruslflokk ef kosið verður Nei. Þeir vilja náttúrulega Icesave málið úr sögunni og ekki fyrir dómstóla þar sem þeir gáfu Icesave toppeinkunn rétt fyrir hrun. Þeir eru ekki hlutlaus aðili að þessu máli. Það er fullt af góðum rökum á advice.is en lítið annað en hræðsluáróður á afram.is – sem flest allt hefur verið afsannað nú þegar.

Ég segi NEI af því að ÉG NENNI að standa vörð um hagsmuni barnanna minna og það sem rétt er, bæði gagnvart íslenskum skattgreiðendum og ekki síður gagnvart öðrum skattgreiðendum í Evrópu. Við erum engann að svíkja með því – og allra síst börnin okkar!

Þetta átti upphaflega að vera hlutlaus grein um já og nei hliðarnar, en það einfaldlega falla öll vötn í NEI reitinn.

Ég vil að lokum þakka Ólafi Ragnari Grímssyni fyrir að vísa þessu máli til þjóðarinnar.

Hjörtur Smárason

Stjórnmálafræðingur (með sérhæfingu í samningaviðræðum smáríkja við stór ríki)

ps. Ef þið teljið þetta geta hjálpað einhverjum að gera upp hug sinn, þá er ykkur mjög velkomið að deila þessu áfram.

Tenglar:

Umfjöllun í The Guardian:

http://www.guardian.co.uk/business/2011/apr/03/icesave-bailout-splits-iceland-voters

Já hliðin:

http://www2.afram.is/

Nei hliðin:

http://www.advice.is/

Ég held ég hafi aldrei talað um Bakkafjörumálið svokallaða hérna á blogginu, en eftir miklar umræður í fjölmiðlum (allavega hér í Eyjum) upp á síðkastið verð ég bara að fá að tjá mig um þetta stórmikilvæga mál sem snertir okkur öll sem hér á þessari eyju búum.

Nú er mikið rætt um undirskriftalista sem Magnús Kristinsson stendur fyrir á heimasíðunni ströndumekki.is þar sem um 2800 manns hafa skráð sig þegar þetta er skrifað. Ég renndi augunum í fljótu bragði yfir listann og gat ekki betur séð en að fólk sé að skrá börnin sín þarna (þá meina ég ungabörn) sem ég tel bara vera vitleysu. Í rauninni mun þessi undirskriftasöfnun gera lítið annað en að tefja framkvæmdir við Bakkafjöruhöfn þar sem ríkisstjórnin hefur þegar samþykkt þessar framkvæmdir. Af hverju kom þessi listi ekki löngu fyrr? Að setja þetta fram svona núna þegar allt hefur verið samþykkt minnir mann nú bara á mótmæli Ómars Ragnarssonar við Kárahnjúkum, og við vitum öll hvernig það endaði.

Ég get ekki annað en verið sammála bæjarstjóranum mínum í því sem fram kemur í svari hans þar sem hann er spurður út í undirskriftasöfnunina á mbl.is. Þar bendir hann á rangfærslur þeirra sem standa að þessari undirskriftasöfnun, þar sem þeir tala um að sjóferðin milli Eyja og Bakkafjöru verði 40 mínútur en réttur tími er 30 mínútur. Þeir tala um að ófært verði stóran part úr árinu en rannsóknir sýna að niðurfelldar ferðir verði ekki meiri en núverandi Herjólfur stendur fyrir.

Helsta vopn þeirra sem að undirskriftasöfnuninni standa er að mínu mati myndbandið sem þeir hafa til sýnis á heimasíðu sinni, á meðan helsta vopn þeirra sem styðja Bakkafjöru er yfir 100 blaðsíðna löng skýrsla frá Siglingastofnun með öllum þeim upplýsingum og svörum sem forvitnir og áhugasamir aðilar um þetta mál þurfa. Hana er hægt að nálgast hér. Ég byrjaði bara að lesa hana í dag og fann strax svör við mörgum spurningum sem ég hafði í sambandi við Bakkafjöruhöfn og hvort hún yrði áreiðanlegur kostur. Ég komst til dæmis að því að:

• Rannsóknarvinna hefur verið í gangi frá árinu 2003
• Bakkafjara er sá staður þar sem ölduhæð er hvað minnst við suðurströnd landsins, hún er í vari af Vestmannaeyjum
• Farþegafjöldi ferjunnar verður vel yfir 300 manns og mun hún geta tekið allt að 36 fólksbíla
• Siglingartími verður um 30 mínútur og gert er ráð fyrir 2 ferðum á dag, 4 yfir sumartímann en fleiri ef þörf krefur.
• Öldumælingar yfir 26 mánaða tímabil sýna að 39 ferðir hefðu fallið niður á þessu tímabili, 36 að vetrarlagi og 3 yfir sumartímann.
• Mörgum af þessum ferðum hefði verið hægt að hliðra um nokkrar klukkustundir og sigla þegar veðrnu slotaði.
• Hefði það verið gert kom í ljós að um 15 ferðir hefðu fallið niður, allar að vetrarlagi.
• Er sú tíðni frátafa sambærileg frátöfum Herjólfs sem að jafnaði verður að fella niður ferðir tvisvar til þrisvar á ári. (Þessi tala hefur nú reyndar verið að hækka, eða er það ekki?)

Mér finnst allt of mikið vera um að einlit umræða myndist um leið og eitthvað svona skýtur upp kollinum (sbr. ströndumekki.is) og mikilvægt að benda fólki á að skoða hlutina út frá báðum sjónarmiðum. Ég veit það að margir nenna að horfa á 5 mínútna langt myndband á YouTube, en ég veit það líka að margir nenna ekki að lesa yfir 100 blaðsíðna skýrslu… Þess má svo til gamans geta að skipstjórinn á Lóðsinum, Sveinn Rúnar Valgeirsson, sagði þetta eftir leiðangurinn sem þeir fóru upp í Bakkafjöru í fyrra, sem hefði kannski mátt fylgja vídjóinu:

“Í sjálfu sér er ég ekki hræddur um að væntanleg ferja gæti orðið í hættu en ég óttast að minni skip gætu orðið fyrir áföllum við þessar aðstæður.”

Kynnum okkur málin áður en við ákveðum að við séum strand.

Ég skellti mér á nokkrar vaktir í Vinnslustöðinni í síðustu viku, sem reyndar teygðu sig alveg fram á mánudagsmorgun núna í þessari viku. Allt í allt held ég að ég hafi nælt mér í um 10 vaktir og er ég bara nokkuð sáttur við það… allavega ef það gengur eftir sem sjávarútvegsráðherra hefur gefið út um loðnukvóta. Hefðbundnum veiðum var hætt á hádegi á föstudaginn síðasta en ég held reyndar að Kapin hafi fengið að fara út aftur á laugardagskvöld vegna þess að þeir ‘áttu inni’ óveiddan kvóta sem hafði verið gefinn út fyrir bannið. Svo nú eru nokkur skip að aðstoða hafrannsóknarskipin við loðnuleit á miðunum og heyrði ég í fréttunum í gær að þeir væru nú að finna ágætis magn af loðnu hérna aðeins austan við Eyjarnar.

Sjómenn hafa reyndar kvartað mikið undan seinagangi Hafró manna, um að þeir skili sér seint á miðin til mælinga eftir að skipstjórar hafa látið þá vita af torfum. Las reyndar helvíti góða grein frá áhöfninni á Faxa RE sem er að finna hér. Mjög fyndin og lýsir að ég held mjög vel skoðunum sjómanna á þessu loðnuveiðibanni og áliti þeirra á Hafró. Las nú samt frétt á mbl.is þar sem sagt er að loðnumælingar standi nú yfir á fullu og að ‘allt sé í sómanum’ – að sögn Sveins Sveinbjörnssonar leiðangursstjóra. Hvað maður á svo að lesa út úr þeim skilaboðum kemur vonandi í ljós fyrr en síðar, því ekki veitir manni nú af meiri pening, fátæki námsmaðurinn sjálfur. Svo er þetta líka bara svo gaman!

Jæja, ætla ekki að hafa þetta lengra. Kominn tími á svefn. Set hérna inn úrslit könnunarinnar sem ég lét fylgja með síðustu færslu… þar sem greinilega langflestir skoða mbl.is mest.

[poll=2]

Ég hef velt því svolítið fyrir mér uppá síðkastið hvaða net-fréttamiðil fólk sé aðallega að nota hérna á Íslandi. Ég sjálfur hef hingað til langmest notað mbl.is og talið þá síðu vera eiginlega ‘mömmu’ íslenskra net-fréttamiðla. Það var svo núna þegar ég byrjaði í stjórnmálafræði í skólanum að ég fór að spá meira í þessu og þá sérstaklega hverjir það séu sem eiga þessa fréttamiðla og hvort þeir með einhverjum hætti stjórni því hvað sé birt og hvað ekki. Strax var byrjað að tala um Moggann sem ‘blátt’ blað og að ‘bláa höndin’ ráði þar ríkjum. Ég hafði í sjálfu sér aldrei spáð í því hvort menn gerðu þetta, keyptu sér fjölmiðil með það að markmiði að hafa áhrif á fréttaflutninginn með beinum eða óbeinum hætti. Ástæðan fyrir því að ég valdi mbl.is fram yfir visir.is var sú að ég tengdi síðarnefndu síðuna alltaf við DV, sem er eitt mesta ruslblað sem ég hef augum litið, en það er víst liðin tíð og nú er þetta netmiðill Stöðvar 2 sem er í eigu 365 með meiru.

Það er auðvitað grafalvarlegt mál ef eigendur fjölmiðla ætla sér að hafa áhrif á eða jafnvel banna fréttaflutning af ákveðnum ‘viðkvæmum’ málefnum. Ég ákvað því að bera þessa tvo stærstu net-fréttamiðla íslands saman á einn einfaldan hátt. Nú er Mogginn sagður fréttamiðill sjálfstæðismanna svo ég prófaði að skoða fréttaflutning síðanna tveggja af aðalmálinu í pólitíkinni þessa dagana sem snertir Sjálfstæðisflokkinn vissulega. Við skulum hafa það á hreinu að ég er óflokksbundinn og þetta gerði ég einungis fyrir forvitnissakir. Ég skoðaði fréttaflutning beggja fréttavefja um Vilhjálm Þ. Vilhjálmsson og hans ævintýri í borgarstjórn Reykjavíkur frá því að upp komst um REI-málið.

Til þess að gera langa sögu stutta komst ég að því að mbl.is fer mun vægar í allar ásakanir og reynir frekar að koma fréttum að sem vekja samúð með Vilhjálmi. Vísir.is er hins vegar mun meira ásakandi í sínum fréttum og þar er eins og meira sé um æsifréttamennsku. Til dæmis er ein mest lesna fréttin á vísi.is núna fréttin um að Jóhanna Vilhjálmsdóttir (dóttir Vilhjálms Þ. Vilhjálmssonar) sé hætt í Kastljósinu og voru Vísis menn greinilega að reyna að tengja brotthvarf hennar þaðan við það að hart hefur verið hamrað á Vilhjálmi Þ. í Kastljósinu undanfarið. Enn fremur komst ég að því þegar ég fór að skoða síðurnar betur að á forsíðu mbl.is er auglýsing frá Sjálfstæðisflokknum, en þar eru þeir að auglýsa einhvern stjórnmálaskóla (sem ég vissi nú ekki að væri til, ætli það sé kennt manni að setja X við D þar? .

Ég er þó næstum viss um að hægt sé að finna eitthvað sem Vísir.is ákveður að ‘tala minna um’ en er svo háværara á mbl.is, þar sem eigendur Vísis.is er 365 fjölmiðlar, sem er svo að stærstum hluta til í eigu Baugs Group. Baugsfeðgar og Davíð Oddsson hafa sjaldan verið taldir góðir vinir og spurning hvort þessir aðilar beiti völdum sínum til að hafa áhrif á fréttaflutning ‘sinna fjölmiðla’ (ef Sjálfstæðisflokkurinn er við stjórnvölinn í Mogganum eins og menn segja).

Þá er það líka stóra spurningin, er það rétt að hluthafar beiti þrýstingi og ‘ritskoði’ þannig hvað sé birt á fjölmiðli í þeirra eigu? Ég hugsa að flestir með eitthvað á milli eyrnanna svari þessari spurningu neitandi, en er þetta ekki samt að gerast? Fjölmiðlar leika stórt hlutverk í okkar daglega lífi og eiga að mér finnst að vera algjörlega óháðir í öllum fréttaflutningi. Ég er ekki að segja að fjölmiðlar á Íslandi séu það ekki, en ég mun hins vegar héðan í frá leggja leið mína lengra en einungis á mbl.is þegar ég skoða fréttir á netinu.

Svona til að fylgja þessari færslu eftir ákvað ég að setja upp litla könnun og sjá hvaða fréttasíður fólk er mest að nota, og þá er ég að tala um íslenskar fréttasíður. Endilega takið þátt í þessari könnun til að svala forvitni minni…

Lifið heil.

Var rétt í þessu að lesa frásögn manns hér í bæ, þar sem hann lýsir því að hann hafi orðið vitni af því að unglingur í Grunnskólanum hér í Eyjum hafi verið að drekka áfengi fyrir utan húsið hans klukkan 9 um morguninn á skólatíma. Strákurinn var að gúffa í sig hálfum líter af bjór eldsnemma um morgun og það á skólatíma. Ég veit eiginlega ekki hvernig ég á að orða mín viðbrögð við þessu, ég er eiginlega bara orðlaus. Þetta eru að sjálfsögðu skelfilegar fréttir og ættu vonandi að vekja viðbrögð foreldra og kennara hér í bæ. Maður vissi svo sem að það eru alltaf einhverjir krakkar sem byrja að fikta við áfengi í efstu bekkjum grunnskóla, en að um sé að ræða neyslu áfengis í byrjun dags, á skólatíma hlýtur að gefa til kynna að ekki sé allt með felldu heima hjá viðkomandi. Ég hef í það minnsta ekki heyrt um svona lagað áður.

En þetta var nú samt ekki ástæða þess að ég gaf mér tíma til að henda inn nokkrum línum. Í þessari frétt (sem er reyndar blogg frá Þorkeli Sigurjónssyni) talar hann um eigin reynslu af áfengi þegar hann var á grunnskólaaldri, og að sú reynsla hafi verið kveikjan að yfir 40 ára baráttu hans við Bakkus. Ég þekki ekki hans sögu, en samgleðst honum að hafa náð að vinna úr sínum vandamálum að sjálfsögðu. Ég er bara ekki sammála honum þegar hann segir að með “meiru og betra aðgengi” að bjór og léttvíni, (þar sem hann er að tala um frumvarp sem var lagt fyrir á Alþingi og felur í sér að bjór og létt áfengi verði selt í verslunum) sé verið að stuðla að aukinni unglingadrykkju – eða bara aukinni drykkju yfir höfuð.

Ég tel rót áfengisvandans liggja dýpra en í hversu auðvelt (eða ekki) það sé að útvega sér áfengi. Það vita það allir að unglingur sem langar í áfengi, reddar sér áfengi á einn eða annan hátt. Ég held ég geti nú alveg fullyrt það að unglingadrykkja hér á Íslandi er ekkert minni en í nágrannalöndum okkar, þar sem áfengi er selt í verslunum. Þvert á móti hafa Íslendingar orð á sér sem djammkóngar og eru til dæmis auglýstar ferðir hingað til lands þar sem tekið er fram að djammið í Reykjavík sé engu líkt þar sem djammað er fram á morgun og jafnvel lengur, og held ég það séu orð með réttu. Ástandið í miðbæ Reykjavíkur hefur örugglega aldrei verið skuggalegra, fréttir af líkamsárásum, stungum og þess háttar hafa aldrei verið fleiri en nú.

Ég myndi halda að aðstæður heima hjá þessum unga manni, sem Þorkell sá sötra á bjór fyrir utan heima hjá sér klukkan 9 um morgun á skóladegi, sé ástæða þess að hann snýr sér að áfenginu til að “deyfa” tilveruna. Það hvort ákveðið verði að selja áfengi í verslunum eða ekki mun örugglega ekki hafa nein áhrif á það hvort hann eigi eftir að gera þetta aftur eða ekki. Þetta er einstakt dæmi, ég hef allavega aldrei heyrt um svona lagað áður og maður skyldi ætla að ekki sé allt í lagi heima fyrir hjá viðkomandi. Er þá ekki réttara að eiga við þann vanda áður en farið er í að “fyrirbyggja” annan hugsanlegan vanda?

Maður spyr sig…

Já, það er að gerast. Ég ætla að blogga um stjórnmál, eitthvað sem ég hélt ég myndi aldrei gera. En allavega það sem hefur verið mér hugfangið þessa dagana eru þessar blessuðu alþingiskosningar. Gengið verður til kosninga þann 12. maí og ég veit bara ekkert hvað maður á að kjósa!

Þegar ég hugsa út í það hvað það er sem ég vil að flokkurinn sem ég kjósi hafi á sinni stefnuskrá er aðallega þetta:

• Stórbættar samgöngur milli lands og Eyja, ég vil óháða úttekt á kostnaði við göng áður en farið verður út í Bakkafjöru, en á meðan á því stendur þarf að fá stærra skip til að sigla hérna á milli. (sem mér skilst að allir flokkar í suðurkjördæmi séu með á oddinum nema Samfylkingin)
• Bætt kjör fyrir fólkið sem átti þátt í því að gera Ísland að því sem það er í dag. Já ég er að tala um eldri borgara, það er skammarlegt hvernig er komið fyrir mörgum hverjum, 3 – 4 og jafnvel fleiri saman í herbergi. Hjónum stíað í sundur og ég veit ekki hvað og hvað.
• Tvöföldun Suðurlandsvegar þarf að byrja helst í gær, hvað þurfa margir að deyja þarna eða lenda í alvarlegum slysum svo eitthvað sé gert í málunum.
• Tryggja sjávarútvegi á landsbyggðinni örugga starfsemi, en eftir því sem ég get best séð af vafri mínu um síður flokkanna (sem eru mis auðveldar í leit að upplýsingum um stefnumál) er að Frjálslyndi flokkurinn sé sá flokkur sem ætli að beita sér fyrir hruni byggðarlaga úti á landi og fækkun íbúa.

Þetta er svona það sem er efst á baugi hjá mér þegar ég hugsa til þessara kosninga og nú er bara að leggja höfuðið í bleyti því ég þarf að kjósa utankjörstaðar í næstu viku. Kallinn er náttúrulega að fara til London 12. maí

En eru ekki fleiri í sömu sporum og ég? Eða eruði öll harðákveðin?

Ok, gærkvöldið var sniiiiiiiiiiiiiiiiiiiiiilld! Þetta byrjaði allt þannig að ég hitti Hlynsa kaggl á einhverri fjölskylduskemmtun þar sem Brutal var að spila og við ákváðum, ásamt Wixa, gítarleikara Brutal að skella okkur í þessa óvissuferð sem ónefndur stjórnmálaflokkur stóð fyrir um klukkan 8 sama kvöld. Við hittumst allir heima hjá Hlyn rétt yfir átta og röltum svo áleiðis niður í Ásgarð (þar sem rúturnar biðu, og FRÍTT áfengi… þar sem við fengum okkur nokkra kalda og ég hringdi í Svenna og Stebba sem komu svo rétt áður en rúturnar fóru. Keyrt var um alla eyjuna og stoppað út um allt þar sem ýmislegt fjölbreytilegt var gert. T.d. gat mar farið á hestbak á einum stað en það eina sem við hugsuðum um var bollan sem var boðið uppá í einhverjum 20 lítra mjólkurhlunk… Mjög góð bolla Svo fengum við að kasta vatnsblöðrum í frambjóðendurna niðrí dal og læti og óvissuferðin endaði niðrá Skans þar sem voru grillaðar pylsur ofan í liðið og boðið uppá meiri bjór Menn voru orðnir skuggalega drukknir þarna og dæmi um það er ónefndur maður sem var að hlaupa um fjöruna þarna í anda Baywatch og endaði kylliflatur í þarahrúgu sem var í enda fjörunnar. Svo var öllum sagt að fara aðeins lengra í austur þar sem hver annar en Árni Johnsen beið með gítarinn í hönd og varðeld sér við hlið.. manni var farið að líða einsog á Þjóðhátíð bara! Og gott ef það eru ekki bara einhverjir 68 dagar til Þjóðhátíð á meðan ég man En allavega, þetta kvöld var algjör snilld… Ég endaði heima dauður á endanum á rúminu mínu í öllum fötunum samkvæmt nokkuð áreiðanlegum heimildum En svona er lífið… svo er það náttúrulega kosningadjammið í kvöld…! >:)
Kveð í bili…