“Gaman” að segja frá því að Ísland er nú komið á lista með löndum á borð við Venesúela, Gíneu, Líberíu, Rúanda, Eþíópíu, Írak, Íran, Afganistan, Úzbekistan, Sri Lanka og Myanmar (Búrma) yfir ríki sem búa við meira en 15% verðbólgu. Hvað ætli við dettum langt niður á þessum lista þegar hann kemur næst út? Getið séð verðbólgu allra landa heims á myndinni hér fyrir neðan (Þetta eru reyndar allavega árs gamlar upplýsingar frá Íslandi þar sem við erum skráð með 2-5% verðbólgu). Það verður fróðlegt að sjá hvort verðbólguspá Seðlabankans haldist óbreytt… Kannski maður fylgi tískunni og selji einhverjum útlending bílinn sinn bara, nóg er víst af þeim hér á landi eins og er.

Verðbólga í heiminum

Mikið er ég nú ánægður með frændur okkar Færeyinga. Haldiði ekki að þeir hafi samþykkt að lána Íslendingum rúmlega 6 milljarða króna vaxtalaust í þessum erfiðleikum sem við stöndum nú í. Þeir minna enn og aftur á sig enda að mínu mati alltaf litið upp til Íslands (í sinni sjálfstæðisbaráttu og öðru) þótt við höfum kannski ekki sýnt þeim neitt allt of mikla vinsemd til baka. Nú lána þeir okkur 300 milljónir danskra króna sem í dag eru eins og ég sagði rúmlega 6 milljarðar íslenskra króna, en hefði þetta sama lán komið fyrir ári væri það upp á um 3,6 milljarða íslenskra króna. Þess má einnig geta að þetta lán er samkvæmt Wikipedia um 2,3% af vergri þjóðarframleiðslu landsins (fyrir ykkur sem hafið verið í hagfræði).

Mig langar að tileinka þessa færslu frændum okkar Færeyingum og flagga ég því þeirra mjög svo fallega fána í tilefni þess! Þeir fá stóra fjöður í hattinn sinn frá mér.

Færeyski fáninn

Ég ætla bara að byrja þessa færslu á því að sleppa því að reyna að finna ástæður fyrir bloggleysinu síðastliðna mánuði, já ég sagði mánuði! Síðasta færsla var skrifuð í Tyrklandi í sumar og í sjálfu sér lítið merkilegt búið að ske síðan þá og nenni ég engan veginn að fara að tíunda það hér núna.

Hins vegar er gaman að segja frá því að ég skellti mér í að finna nýtt útlit á síðuna og hefur það nú litið dagsins ljós. Ég kem að sjálfsögðu hvergi nærri því að hanna eða smíða þetta útlit, heldur ræni því bara og nota eins og mér sýnist… Ég fór einnig í það að íslenska kerfið sem ég er að nota og er ég svolítið villtur í þessu blessaða íslenska kerfi þessa stundina. Orð eins og hliðarstika, íbætur og uppnýja skrá er eitthvað sem maður er engan veginn vanur því að sjá og þyrfti ég helst að hafa Má nokkurn Jónsson mér við hlið svona á meðan ég er að venjast þessu allavega…

Ég nenni engan veginn að skrifa um kreppuna sem tröllríður öllum fjölmiðlum og bloggum eins og er… ég vil bara segja að sjaldan hef ég verið jafn feginn að eiga engan sparnað í sjóðum eða hlutabréfum eins og komst í tísku fyrir nokkrum árum. Hins vegar sit ég uppi með bíl á myntkörfuláni að hálfu… sem ég er allt annað en sáttur við, þakka bara guði fyrir að hafa ekki farið út í íbúðarkaup eins og ég ætlaði mér fyrr á þessu ári. En nóg um það… ég er kominn aftur, með nýtt andlit (look) og munu skrif hér því að öllum líkindum verða tíðari en síðustu mánuði, enda væri annað erfitt.